Desember 2009
Landlæknisembættið opnaði nýlega Heilsuvefsjá sem er landfræðileg kortavefsjá til birtingar upplýsinga um aldraða og öldrunarmál. Heilsuvefsjáin er ætluð stjórnvöldum og heilbrigðisstarfsmönnum sem og almenningi, en upplýsingarnar eru geymdar í svokölluðu vöruhúsi heilsufarsgagna. Landlæknisembættið hefur í samvinnu við heilbrigðisráðuneytið unnið að uppbyggingu vöruhússins sem er nokkurs konar gagnagrunnur sem inniheldur ýmis gögn um heilsufar Íslendinga og heilbrigðisþjónustuna. Tilgangurinn með vöruhúsinu og vefsjánni er því að bæta aðgengi að og samþætta þau gögn sem þegar eru til hjá hinum ýmsu opinberu aðilum, svo sem Landlæknisembættinu, heilbrigðisráðuneytinu og Hagstofu Íslands. Vefsjáin og vöruhúsið eru liðir í því að búa til vöktunarkerfi heilbrigðisþjónustunnar (health monitoring system).

Júlí 2009
Landmælingar Íslands varðveita verðmætt kortasafn, en yfir 3500 útgáfur korta af Íslandi í safninu voru skráðar í stafræna kortaskrá á stofnunni fyrir nokkrum árum. Stærsti flokkur safnsins eru kort sem upphaflega komu frá kortlagningu Dana hér á landi á tímabilinu 1900 – 1944 og í framhaldi af því kort sem stofnunin hefur viðhaldið og gefið út frá því að hún var stofnsett árið 1956. Í safninu eru einnig útgáfur margra annarra aðila. Jafnt og þétt er unnið að því að skanna þessi kort til að tryggja að stafræn afrit séu til og til að bæta aðgengi að þeim upplýsingum sem á þeim má finna. Sú veflausn sem nú birtist á netinu var þróuð í þeim tilgangi að bæta aðgengi almennings að kortunum. Á þessum vef er hægt að fá ýmsar upplýsingar um kortin úr kortaskránni og einnig að skoða skannanir af kortunum sjálfum. Stefnt er að því að hægt verði að skoða öll kort sem Landmælingar Íslands eiga útgáfurétt á. Á vefnum er hægt að skoða margar útgáfur sömu kortanna frá mismunandi tímum og skoða breytingar. Ljóst er að margir munu fagna auknu aðgengi þessara eldri korta á netinu.

Júlí 2009
Fixlanda ehf hefur unnið 10 ný sérkort sem nú eru komin út hjá Máli og menningu. Kortin eru flest í mælikvarðanum 1:100 000 og á bakhlið þeirra eru nákvæmari kort sem sýna afmarkaðri svæði innan heildarsvæðisins, en flest þeirra eru í mælikvarða 1:50 000. Inn á kortin, sem byggja á sama kortgrunni og Íslandsatlas, eru merktar allar helstu aksturs- og gönguleiðir á svæðunum, auk þess sem þar er að finna mikinn fjölda örnefna og annarra gagnlegra upplýsinga. Þar eru einnig lýsingar og litmyndir af helstu náttúruperlum svæðisins og fuglateikningar eftir Jón Baldur Hlíðberg. Allur texti er á íslensku, ensku, þýsku og frönsku. Kortin sýna eftirtalin svæði: Reykjanes-Þingvellir, Gullfoss–Geysir–Hekla, Kjölur– Langjökull–Kerlingarfjöll, Landmannalaugar–Þórsmörk–Fjallabak, Skaftafell, Lónsöræfi– Snæfell, Askja–Herðubreið–Kverkfjöll, Akureyri–Mývatn–Dettifoss, Hornstrandir og Snæfellsnes.

Júní 2009
Fyrir nokkru kom á markaðinn ný útgáfa af Íslandskorti fyrir Garmin leiðsögutæki. Um er að ræða vektorkort fyrir Garmin GPS tæki með leiðsöguhæfum vegakortum, ásamt götukorti af bæjarfélögum með heimilisföngum.  Á kortinu eru um 40.000 örnefni, meira en 5.000 áhugaverðir staðir (POI), upplýsingar um vatnafar, þjóðvegi og fjallaslóða, en hæðarlínur eru með 20 metra millibili.  Kortið er ætlað fyrir Garmin GPS, PC og Apple tölvur eða Smart GSM síma.
Meðal nokkurra nýjunga í þessari útgáfu má nefna að tvöfaldir vegir hafa verið skilgreindir á höfuðborgarsvæðinu og í nokkrum bæjarfélögum, nýjustu hverfin í bæjarfélögum hafa bæst við og  þjóðvegir hafa verið lagfærðir eftir breytingar. Þá hefur strandlína verið uppfærð, skóglendi kemur fram, vötn eru skráð í örnefnaflokk og nokkrar gönguleiðir eru komnar inn. Kortin eru fáanleg hjá fjölda söluaðila um allt land.

Júní 2009
Tólfta útgáfa ferðakorts í mælikvarða 1:600 000, sem er heildarkort af Íslandi, er komin út hjá Máli og menningu. Á kortinu eru meðal annars nýjustu upplýsingar um vegakerfi landsins, tjaldstæði, sundlaugar, söfn og vegalengdir milli staða. Kortið er prentað í náttúrulegum litum þar sem sérstök áhersla er lögð á gróðurlendi og myndræna skyggingu hálendisins. Á bakhlið ferðakortsins eru lýsingar og litmyndir af helstu náttúruperlum landsins.
Þá er áttunda útgáfa fjórðungskorta í mælikvarða 1:300 000 einnig komin út. Þar er landinu skipt upp í fjóra jafna hluta eftir landsfjórðungum. Öll fjórðungskortin skarast nokkuð og á þeim eru nýjustu upplýsingar um vegakerfi landsins, tjaldstæði, sundlaugar, söfn og annað það sem gagnast ferðamönnum. Á bakhlið þeirra eru lýsingar og litmyndir af helstu náttúruperlum fjórðunganna, þar sem bent er á ýmis einkenni viðkomandi staða. Þar er einnig að finna ítarlega vegalengdatöflu. Allur texti er á fjórum tungumálum, íslensku, ensku, þýsku og frönsku.

Janúar 2009
Orkustofnun hefur tekið í notkun nýja vefsjá vegna umsýslu sinnar um auðlindir á landgrunni Íslands, en hana má finna á vefslóðinni www.landgrunnsvefsja.is. Vefsjánni er fyrst um sinn ætlað að gefa yfirlit yfir gögn sem tengjast Drekasvæðinu og gera upplýsingar um þau aðgengilegri á veraldarvefnum, en opnun vefsjárinnar tengist 1. útboði vegna rannsóknaleyfa á kolvetni á norðanverðu Drekasvæðinu.
Í vefsjánni má sjá yfirlitsgögn yfir hafsbotninn á svæðinu, fá fram upplýsingar um rannsóknaleiðangra, einkum hljóðendurvarpsmælingar og fjölgeislamælingar og sjá reitakerfi fyrir landgrunnið norðaustur af Íslandi sem og fyrir Drekasvæðið. Markmiðið með vefsjánni er ekki að birta sjálf frumgögnin, heldur auðvelda þeim sem vilja fá upplýsingar að finna hvaða gögn eru til, af hvaða svæðum, hver aflaði þeirra og hvernig, hvenær gagnaöflunin fór fram og vísa til þess hvar mögulegt er að fá aðgang að gögnunum sjálfum. Til fróðleiks eru í vefsjánni birtir stuttir textakaflar til að gefa fyllri upplýsingar um svæðið og gögn sem þar hefur verið aflað. Gert er ráð fyrir að birta síðar í vefsjánni niðurstöður leyfisveitinga til leitar, rannsókna og vinnslu kolvetna á norðurhluta Drekasvæðisins ásamt yfirliti um þær rannsóknir sem þar verða gerðar, svo sem um boranir.
Landgrunnsvefsjáin nýtir vefhugbúnað sem upphaflega var þróaður af hugbúnaðarfyrirtækinu Gagarín vegna verkefnis um Náttúruvefsjá, en fyrir Landgrunnsvefsjána hefur fyrirtækið bætt við fleiri þáttum í veflausnina. Þar ber helst að nefna möguleikann á birtingu upplýsinga á tveimur tungumálum, en allur texti er birtur bæði á íslensku og ensku. Vefsjáin gefur því kost á að miðla ýmiss konar upplýsingum eins og fróðleik, lýsigögnum og ítarefni, þar sem vísað er til annars efnis með tenglum í gagnatöflur, vefsíðu Orkustofnunar og vefsíður ýmissa erlendra aðila. Gögnin í Landgrunnsvefsjánni eru bæði vektor gagnasöfn og rastamyndir sem aðgengilegar eru gegnum vefþjónustu, en yfirlitsgögnin hafa flest verið unnin vegna verkefnisins í samstarfi Orkustofnunar við Íslenskar orkurannsóknir (ÍSOR).

Nóvember 2008
Þann 15. október s.l. var opnuð ný veflausn sem birtir fjölbreytt gögn um náttúrufar og auðlindir Íslands á vefslóðinni www.natturuvefsja.is. Náttúruvefsjáin er afrakstur þróunarsamstarfs sem á uppruna sinn í verkefni sem hlaut styrk frá Rannís árið 1999 og hefur verið þróað áfram  undir stjórn Vatnamælinga Orkustofnunar með framlagi frá Orkustofnun, upplýsingasamfélaginu, og Gagarín með aðkomu stofnana sem sinna öflun gagna um náttúru Íslands. Lausnin bætir m.a. möguleika almennings og skólafólks á að skoða náttúrufarsupplýsingar og fræðast um auðlindir landsins á lifandi hátt. Markmiðið með Náttúruvefsjánni er að koma gögnum og niðurstöðum úr rannsóknum einstakra stofnana á framfæri á sameiginlegum vettvangi og í almenna notkun í leik og starfi. Þau nýtast jafnt stjórnsýslu, sérfræðingum, almenningi og fyrirtækjum, s.s. vegna búsetubreytinga, húsbygginga, í tengslum við ferðalög, afþreyingu og útivist.

September 2008
Um miðjan september var opnaður nýr vefur, Náttúrukortið, en þar er gervitunglamynd af Íslandi sem gefur yfirsýn yfir þau svæði sem hafa verið nýtt eða fyrirhugað er að nýta til orkuframleiðslu eða raska á annan hátt. Svæðin eru merkt inn á myndina og kemur þar fram hvar í “virkjunarferlinu” fyrirhuguð virkjunarsvæði eru, það er að segja hvort framkvæmdir séu hafnar, hvort svæðið sé “í sigtinu” fyrir raforkuframleiðslu eða hvort svæðið sé óraskað. Að Náttúrukortinu stendur Framtíðarlandið, félag áhugafólks um framtíð Íslands.

Ágúst 2008
Loftmyndir ehf. hafa á liðnum mánuðum unnið svonefndar "kortasjár" fyrir nokkur sveitarfélög og eru þær flestar byggðar á loftmyndagrunni fyrirtækisins. Mismunandi er þó hvaða upplýsingar eru birtar í hverri vefsjá. Samkvæmt vefsíðu Loftmynda ehf, hafa eftirtalin sveitarfélög látið vinna fyrir sig nýjar kortasjár: Akureyrarbær, Akranes, Blönduós, Fjarðabyggð, Fljótsdalshérað, Mosfellsbær og Norðurþing.

Júní 2008
Fixlanda ehf. hefur opnað nýja vefsíðu og netverslun með kort og kortabækur, www.fixlanda.is. Fyrirtækið sérhæfir sig í kortagerð og sölu korta, en þekktustu verkefni fyrirtækisins eru án efa fjölmörg kort sem Hans H. Hansen hefur unnið á undanförnum árum fyrir Mál og menningu, þ.m.t. Kortabók  og Íslandsatlas. Fixlanda hefur einnig unnið að ýmsum korta- og landupplýsingaverkefnum fyrir sveitarfélög, fyrirtæki og stofnanir. Í vefversluninni má panta þær vörur sem fyrirtækið hefur unnið og þar er mögulegt að skoða sýnishorn af kortum. Á vefsíðunni eru fjölbreyttar upplýsingar um fyrirtækið, sögu þess og verkefni.

 

Maí 2008
Landmælingar Íslands hafa uppfært vefsjána Myndaskjá, sem birt hefur upplýsingar um loftmyndir og Landsat gervitunglagögn undanfarin misseri. Umsýsluhugbúnaðurinn hefur verið uppfærður og framsetningarhluti hans hefur fengið nýtt útlit, en sú vinna hefur farið fram í samstarfi við Samsýn. Gögnin í myndaskjánum byggjast á um 70 gervitunglamyndum af landinu frá tímabilinu 2002-2007, en þær komu frá franska gervitunglinu SPOT-5. Þessi gögn voru upphaflega keypt til landsins í samstarfi fjölmargra íslenskra stofnana og sveitarfélaga. Landmælingar Íslands fengu síðan fyrirtækið GAF í Þýskalandi til að skeyta myndunum saman þannig að þær líti út sem ein heildarmynd af öllu landinu. Heildarmyndin er birt þannig að hver myndeining sýnir 10x10 metra reit á yfirborði, en Spot-5 gögn geta haft allt að 2,5 metra greinihæfni.

Mars 2008

Landmælingar Íslands hafa í samstarfi við Samsýn sett upp nýja vefsjá fyrir Atlaskort og birtist hún á forsíðu vefs stofnunarinnar.  Atlaskortin eru 87 talsins og voru þau upphaflega gerð af dönskum landmælingamönnum á fyrstu fjórum áratugum 20. aldar. Þau eru af mörgum talin meðal fallegustu korta af Íslandi. Kortin eru í mælikvarða 1:100 000, með 20 metra hæðarlínubili og sýna helstu atriði á yfirborði landsins, svo sem vegi, slóða og stíga ásamt fjölda örnefna. Gerð kortanna var mikið þrekvirki á sínum tíma og eru þau mikilvægur hluti af sögulegum menningararfi þjóðarinnar.  Í vefsjánni birtast kortin samsett sem ein heild, en þannig komu þau fyrst fyrir sjónir almennings á svonefndum Atlaskortadiski fyrir nokkrum árum. Atlaskortin voru síðast uppfærð árið 1989. Vefsjáin býður möguleika á að leita eftir örnefnum, en jafnframt er hægt að slá inn heimilisföng og fá fram staðsetningu á korti þó Atlaskortin hafi ekki þá nákvæmni til að bera sem þarf til að sýna staðsetningu einstakra heimilisfanga. Hægt er að skoða kortin allt niður í mælikvarða 1:38 500, eins og fram kemur á vefsíðu LMÍ. 

Janúar 2008
Nýtt sjókort í mælikvarða 1:100 000 af Austfjörðum, Glettinganes – Hlaða,  er komið út hjá Sjómælingum Íslands. Kortið, sem er nr. 73, nær frá Glettinganesi, sunnan Borgarfjarðar eystri að Hlöðu í Breiðdalsvík. Kortið leysir af hólmi eldra kort með sama nafni og númeri, en gamla kortið var gefið út af „det kongelige Søkort-Arkiv“ í Kaupmannahöfn í október 1944. Dýptarmælingarnar sem sú útgáfa kortsins byggir að stærstum hluta á voru gerðar árið 1898, eða fyrir 109 árum.
Útkoma hins nýja sjókorts er mikilsverður viðburður bæði fyrir sjómælingasvið Landhelgisgæslunnar og ekki síður sjófarendur við Ísland sem fá nú í hendur kort sem byggir á nýjustu upplýsingum um svæðið. Nýja kortið byggir á dýptarmælingum sem gerðar voru á mælingabátnum Baldri á árunum 2003 og 2004. Mælingar nærri landi og inni á fjörðum voru gerðar með fjölgeisladýptarmæli, en önnur svæði voru mæld með venjulegum bergmálsdýptarmæli.

Desember 2007
Máli og menning hefur gefið út nýjan atlas með gervitunglamyndum “Jörðin í öllu sínu veldi”, eftir Douglas Palmer í þýðingu Arnar Sigurðssonar.

Í kynningartexta um verkið segir á vef fyrirtækisins:
“Jörðin í öllu sínu veldi birtir okkur glæsilegustu myndir sem nokkru sinni hafa verið teknar af hnettinum okkar, plánetunni Jörð. Gervitunglamyndir frá bandarísku geimferðastofnunni NASA hafa verið unnar með fullkomnustu tækni og útkoman er myndaatlas sem sýnir allt yfirborð jarðarinnar, verk sem hiklaust mætti kalla heimsatlas 21. aldarinnar. Hér getum við fylgst með Amazonfljótinu streyma frá upptökum sínum í Andesfjöllum til sjávar í Atlantshafi, skoðað óteljandi sandöldur Sahara-eyðimerkurinnar eða fellingafjöllin miklu sem urðu til við árekstra flekanna sem mynda jarðskorpuna. Við getum séð hvernig árstíðirnar og veðrið breyta ásýnd jarðarinnar, þegar snjórinn fellur á norðurhvelið og bráðnar á suðurhvelinu og víðátturnar blómstra og skrælna í takt við regnið. Hér er stórbrotin og sláandi fegurð jarðarinnar í brennidepli, fjöllin og eyðimerkurnar, vötnin og höfin, og það umhverfi sem mótað hefur tilvist og sögu mannsins frá upphafi vega. Hér fáum við að sjá, frá nýju og heillandi sjónarhorni, heimkynni okkar í öllu sínu veldi - þennan dýra fjársjóð sem við eigum öll saman.
Douglas Palmer er vísindamaður og fyrirlesari við Háskóla símenntunar í Cambridge. Hann er höfundur fjölda bóka um jörðina og dýralíf hennar, m.a. um risaeðlur, steingervinga og þróun mannsins.” 
Jörðin í öllu sínu veldi er 224 bls. í stóru broti og kemur í vandaðri öskju.

Nóvember 2007
Fyrirtækið R. Sigmundsson hefur sett á markað nýja uppfærslu á Íslandskorti fyrir Garmin GPS tæki, útgáfu 3,5. Um er að ræða leiðsöguhæf vegakort fyrir allt landið ásamt götukorti af bæjarfélögum, 40.000 örnefnum, yfir 4.000 áhugaverðum stöðum og hæðarlínum með 20 metra bili. Kortin eru ætluð til notkunar í Garmin GPS, PC heimilistölvum eða Windows Mobile handtölvum. Í nýju útgáfunni eru ýmsar viðbætur, lagfæringar og breytingar. Þar má nefna: einfaldari innslátt á heimilisfangi, fleiri og greinilegri slóða og leiðrétta staðsetningu ýmissa sveitabæja og örnefna. Þá hafa upplýsingar um vatnafar verið stórbættar, ný uppistöðulón hafa verið sett inn og viðbætur gerðar á vega- og gatnakerfi svo eitthvað sé nefnt. Kortagögnin er unnin af fyrirtækjunum Samsýn og Hnit hf.

Nóvember 2007
Landmælingar Íslands hafa birt á vefsíðu sinni nýja vefsjá - Kortaskjá IS 50V. Í vefsjánni eru gögn sem eru að mestu byggð á hinum stafræna kortagrunni Landmælinga Íslands IS 50V. Upplýsingarnar eru sóttar jafnóðum í gagnagrunn og er hægt er að leita eftir örnefnum og heimilisföngum á einfaldan hátt.  Þegar þysjað er inn í kortið birtast hin ýmsu lög grunnsins smám saman. Ekki er hægt að þysja lengra inn en sem nemur mælikvarða 1:10 000. Hægt er að fá fram nánari skýringar vegna notkunar með því að smella á skýringahnapp. Vefsjáin er unnin í samstarfi við fyrirtækið Samsýn.

Október 2007
Landmælingar Íslands hafa sett upp á forsíðu vefs stofnunarinnar, nýjan kortaskjá fyrir upplýsingar um sveitarfélög á Íslandi. Á kortaskjánum er hægt að fá upplýsingar um nöfn sveitarfélaga, íbúafjölda, stærð í ferkílómetrum og fjölda íbúa á ferkílómetra.  Landfræðilegar upplýsingar koma úr IS 500V grunni LMÍ, en upplýsingar um fjölda íbúa eru fengnar frá Hagstofu Íslands og miðast við 31. desember 2006.  Hugbúnaðurinn sem notaður er kemur frá Samsýn ehf. og ESRI.   Sveitarfélög á Íslandi

Ágúst 2007

Námsgagnastofnun hefur í samstarfi við fyrirtækið Gagarín og Landmælingar Íslands opnað nýja kortavefsjá með upplýsingum um ýmsa þekkta staði á Íslandi, þ.e. ár, eyjar, fjöll, fossa, jökla, stöðuvötn, þéttbýli og þjóðgarða. Mynd frá Mats Wibe Lund birtist ásamt texta um valda staði þegar smellt er á nafn staðar á korti. Hægt er að færa sig til eftir kortinu og draga landshluta nær (þysja inn) og skoða þá aðeins lítinn hluta kortsins. Í nokkrum tilfellum er vísun í nánari upplýsingar um staði á annarri vefslóð. Kortavefsjá af Íslandi.

Ágúst 2007

Markmiðið með þessum nýja vef Námsgagnastofnunar er að veita vitneskju um veröldina sem við lifum í.  Á vefnum er gagnagrunnur sem hefur að geyma upplýsingar um marga ólíka þætti sem tengjast málefnum landa heimsins. Út frá stafrófsröðuðum lista og listum yfir lönd eftir heimsálfum má m.a. finna upplýsingar um landið, sögu þess, þjóðina sem þar býr, íbúafjölda, stjórnarfar, efnahag, náttúruauðlindir, hita og úrkomu. Þá má t.d. sjá fána landsins, spila þjóðsöng og skoða yfirlitskort. Lönd heimsins

Júní 2007
Mál og menning hefur gefið út fjögur ný fjórðungskort af Íslandi í mælikvarða 1:300 000. Kortin ná yfir Suðvesturland, Norðvesturland, Norðausturland og Suðausturland. Við endurgerð kortanna hefur sérstök áhersla verið lögð á nýtt og vandað hæðarlíkan af landinu  í náttúrulegum litum þar sem sérstök áhersla er lögð á gróðurlendur landsins og myndræna skyggingu hálendisins. Fjölmörg náttúrufyrirbæri, eins og fjallgarðar og jöklar, sjást nú mun betur en áður.
Á kortunum eru nýjustu upplýsingar um vegakerfi landsins, tjaldstæði, sundlaugar, söfn og annað það sem gagnast ferðamönnum. Á bakhlið þeirra eru lýsingar og litmyndir af helstu náttúruperlum fjórðunganna, þar sem bent er á ýmis einkenni viðkomandi staða og er allur texti á fjórum tungumálum, íslensku, ensku, þýsku og frönsku. Þar er einnig að finna ítarlega vegalengdatöflu.

Júní 2007
Á nýrri vefsíðu Ferðakorta má finna ýmsar gagnlegar upplýsingar um starfsemi fyrirtækisins og helstu kortaflokka sem það hefur til sölu, en Iðnmennt ses. eigandi Ferðakorta keypti sem kunnugt er útgáfugrunna og kortalager Landmælinga Íslands fyrr á þessu ári.
Komin er á markað ný prentun af nokkrum vinsælustu kortunum sem áður komu út hjá LMÍ, en þau eru með nýjum kápum og nú seld í plastvösum. Um er að ræða öll þrjú ferðakortin í mælikvarða 1:250 000 sem saman þekja allt landið með mikilli skörun milli kortblaða og hið vinsæla heildarkort af Íslandi, Ferðakort 1:500 000, sem kemur nú í nýrri prentun. Sama er að segja um sérkort Þórsmörk-Landmannalaugar og útivistarkort af Suðvesturlandi. Þá er einnig komin ný prentun af Vegaatlas í mælikvarða 1:200 000, sem er handhæg gormabók í bílinn. Kortin fást á sölustöðum korta um allt land, en sérverslun með kort Ferðakorta er í Iðnú bókabúð, Brautarholti 8, Reykjavík.

Maí 2007
Á vefsíðu símaskrárinnar Já.is er komin upp ný gagnvirk kortaþjónusta, sem býður uppá fjölbreytta korttengda leitarmöguleika  þegar finna þarf heimilisföng og símanúmer aðila á ýmsum sviðum í samfélaginu. Vefsjáin er unnin af fyrirtækinu Gagarín og byggir meðal annars á gögnum frá Landupplýsingakerfi Reykjavíkur (LUKR), Landmælingum Íslands og heimilisfangaskrá Hnits hf.

Vefsjáin er þannig uppbyggð að auk leitar á korti eða loftmynd, t.d. að ákveðnu heimilisfangi, er hægt að leita eftir ákveðnum þjónustuflokkum samkvæmt níu landsvæðum. Þar eru síðan fjórir undirflokkar sem skiptast nánar innbyrðis. Gisting er flokkuð í nokkra flokka allt frá hótelum til tjaldsvæða, menning felur meðal annars í sér bíó, bókasöfn og önnur söfn og afþreying sýnir síðan m.a. golfvelli og sundlaugar. Undir flokknum annað, má m.a. finna aptótek, banka, bensínstöðvar, heilsugæslu/sjúkrahús, lögreglu, pósthús og upplýsingamiðstöðvar.

Maí 2007
Skipulags- og byggingarsvið Reykjavíkurborgar hefur opnað nýjan vef sem ber nafnið Veldu þinn stað og er markmiðið með honum að borgarbúar geti skoðað á Netinu ný íbúðasvæði og lóðir sem verða til úthlutunar á næstunni. Með vefnum verða uppbyggingar- og úthlutunaráform borgarinnar öllum aðgengileg. Upplýsingakort sýnir uppbyggingarsvæðin í borginni, hvar þau eru og hvenær úthlutun hefst. Notendur geta skoðað hvert svæði, stækkað myndir, opnað skjöl með nánari upplýsingum, lesið greinargerðir, séð þrívíddarmyndir, yfirlitsuppdrætti, sneiðmyndir og fleira.

Apríl 2007
Sjómælingar Íslands gáfu nýlega út nýtt sjókort af Reyðarfirði. Kortið er nr. 716 og inni á því er hin nýja höfn Fjarðaráls við Mjóeyri. Kort þetta kemur í stað eldra korts af innsta hluta Reyðarfjarðar sem var með saman númer og í sama mælikvarða. Kortið er í fullri sjókortastærð (72x102 cm), mælikvarðinn 1:10 000, viðmiðun er WGS-84 og mörk kortsins: 65°00'00"n - 65°03'30"n, 14°02'00"v - 14°14'00"v.
Á sama tíma kom út ný útgáfa af sjókorti nr. 363 sem er af höfnunum í Hafnarfirði og Straumsvík, auk þess sem nýar útgáfur er einnig komnar af kortunum af Akureyri og Norðfirði. Eldri útgáfur af þessum kortum eru þar með fallnar úr gildi.

Á vefsíðu Sjómælinga hefur Hilmar Helgason framkvæmdastjóri sjómælingasviðs Landhelgisgæslunnar fjallað um mismunandi rithátt á staðsetningum sem eru gefnar upp í breidd og lengd í opinberum tilkynningum, lögum eða reglugerðum, en hér er vakin sérstök athygli á þessari umfjöllun.

Mars 2007
Snertill hefur undanfarin misseri boðið uppá ýmsar spennandi lausnir með Infrapath landupplýsingakerfinu fyrir sveitarfélög. Korta- og þjónustukerfi Infrapath veitir íbúum þær upplýsingar úr korta- og gagnagrunni sveitarfélagsins, sem leyfilegt er að veita og birta á veraldarvefnum. Á vefsíðu Snertils, undir flipanum Infrapath landupplýsingar, er nú beinn aðgangur að slíkum upplýsingum 12 sveitarfélaga. Þau eru: Akureyri, Dalvíkurbyggð, Grindavík, Grundarfjarðarbær, Hafnarfjarðarbær, Húnaþing vestra, Kópavogsbær, Rangárþing ytra, Reykjanesbær, Seltjarnarnes, Skútustaðahreppur og Snæfellsbær. Infrapath og tengd kerfi eru nú í notkun hjá alls 15 sveitarfélögum hér á landi. Vefásýndin er samræmd með ýmsum valmöguleikum, m.a. er hægt að velja þar milli 6 tungumála, en yfirflokkar kerfisins eru: íbúar, fasteignir, teikningar, skipulag, götur, veitur, umsóknir og þjónusta. Vefur Snertils www.snertill.is og vefsíður viðkomandi sveitarfélaga veita beinan aðgang að áðurnefndum upplýsingum, auk þess sem hægt er að komast í upplýsingar hvers sveitarfélags á forsíðu landakort.is í kaflanum "Vefsjár sveitarfélaga".

Mars 2007
Fyrirtækið Loftmyndir ehf. hefur í á annan áratug haft það að markmiði að kortleggja allt Ísland með mikilli nákvæmni. Fyrirtækið hefur staðið fyrir viðamikilli og skipulegri loftmyndatöku af landinu þar sem teknar hafa verið á þriðja tug þúsunda loftmynda. Með markvissri vinnu er nú til orðinn nákvæmur kortagrunnur af Íslandi sem unninn er og viðhaldið af starfsmönnum fyrirtækisins.
Map24 er ný vefkortaþjónusta hér á landi. Íslensk gögn úr gagnagrunni Loftmynda eru nú aðgengileg á veraldarvefnum, en þar er t.d. hægt að fletta upp í heimilsfangagrunni fyrirtækisins þar sem skráð er nákvæm staðsetning yfir 99% heimilsfanga á Íslandi.  Þá er á Map24 bæði hægt að fá vegvísun milli staða á Íslandi og í öðrum löndum þar sem finna má nákvæm götukort af öllum helstu viðkomustöðum ferðaglaðra Íslendinga og er þannig einfalt að skipuleggja ferðalög erlendis. Hugbúnaðurinn, sem er frá Mapsolute Gmbh, er þekktur víða um lönd og byggir á langri reynslu. Gögnin eru síðan frá Loftmyndum ehf., Tele Atlas og Navteq. Unnið er að nánari þróun verkefnisins og munu ýmsir kostir verða kynntir á næstunni. Með þessari nýju þjónustu við íslenska kortanotendur og ferðamenn skapast ótal nýir möguleikar sem margir munu fagna.

Febrúar 2007
Út er komin hjá Námsgagnastofnun aukin og endurskoðuð útgáfa af Kortabók handa grunnskólum. Bókin er átta síðum stærri en fyrri útgáfa. Bætt hefur verið við opnukorti af Íslandi fremst í bókinni og kort yfir landshlutana eru ítarlegri og auðveldari aflestrar en áður. Nokkrum þemakortum hefur verið bætt við alþjóðlega hlutann, m.a. um sólkerfið. Þá eru nafnaskrár ítarlegri en í fyrri útgáfum. Bókin er sem fyrr unnin í samstarfi við Liber - útgáfuna í Stokkhólmi en Íslandskort eru að mestu fengin frá Landmælingum Íslands og Jean-Pierre Biard kortagerðarmanni. Á bókarkápu er kort Guðbrands biskups Þorlákssonar sem kom út í hollensku kortasafni árið 1590. Kortið var lengi undirstaða þeirra myndar sem birtist af landinu, skreytt fjölda mynda af ófreskjum og sæskrímslum og er skemmtilegt að bera það saman við nútíma kort og myndir.

Febrúar 2007
Fyrirtækið Iðnmennt ses, sem meðal annars rekur bókaútgáfu undir merkjum IÐNÚ, hefur keypt útgáfugrunna sem notaðir hafa verið við útgáfu helstu ferðakorta frá Landmælingum Íslands. Grunnarnir voru boðnir út  og var Iðnmennt með hæsta tilboðið. Um er að ræða Vegaatlas 1:200 000, Ferðakort 1:250 000, Ferðakort 1:500 000, Ferðakortabók 1:500 000 og Ferðakort 1:750 000. Iðnmennt hefur jafnframt keypt eldri kortalager LMÍ. Eins og fram hefur komið tóku ný lög um landmælingar og kortagerð gildi 1. janúar 2007, en þar kemur meðal annars fram að Landmælingar Íslands skuli hætta sölu prentaðra korta. Stofnunin hefur með þessu hætt gerð, útgáfu og sölu ferðakorta sem hefur verið stór hluti starfseminnar um áratuga skeið.

Opnaður hefur verið nýr vefur, Á vegi, sem stuðla á að því að vegfarendur haldi sig á þeim vegum sem ætlaðir eru almenningi. Sigríður Anna Þórðardóttir umhverfisráðherra opnaði vefinn en verkefnið er í umsjá umhverfisráðuneytisins. Landmælingar Íslands hafa lagt til kort, vegnúmeraleit og örnefnaleit til verksins, en auk þeirra kemur Umhverfisstofnun að verkefninu.

Komin er út ný útgáfa Kortabókar Íslands hjá Máli og menningu. Bókin inniheldur ný kort í mælikvarða 1:300 000, með útliti Íslandsatlass Eddu, sem kom út á síðasta ári. Svipbrigði landsins eru sýnd á 60 kortum sem unnin eru með stafrænni kortatækni og sýna landið allt, frá hæstu tindum til ystu annesja og eyja. Kortabókin er gormabundin í hentugu handbókarbroti og geymir yfir 9000 örnefni. Auk þess eru í henni fjöldi þéttbýliskorta, ítarlegar nafnaskrár og kort yfir tjaldstæði, sundlaugar, söfn og golfvelli. ISBN: 9979-3-2753-7

Landmælingar Íslands hafa gefið út nýjan Vegaatlas í mælikvarða 1:200 000. Kortin í atlasinum eru unnin upp úr ferðakortum í mælikvarða 1:250 000, en þannig fæst meira rými fyrir ýmsar ferðaupplýsingar. 
Auk venjulegra korta sem eru á 50 blaðsíðum eru ýmis þemakort, s.s. um gististaði, tjaldsvæði, söfn, sundlaugar, golfvelli og fleira. Einnig er ítarleg nafnaskrá með yfir 15.500 örnefnum. Sérstaða bókarinnar felst meðal annars í skemmtilegu formi sem er á henni, en samanbrotin er hún aðeins 16 x 31 cm og því handhæg í bílinn. Þegar Vegaatlasinn hefur verið opnaður koma kostir þessa brots í ljós því þá er hægt að skoða opnu sem er um 60 cm breið og gefur því mjög góða yfirsýn yfir stórt landsvæði. Einnig er hægt að skoða eina blaðsíðu eða þá brjóta bókina saman í upphaflega formið og er notandinn þá kominn með 16 cm breiða kortasíðu. (Apríl 2006). 

Náttúrufræðistofnun Íslands hefur opnað nýja Plöntuvefsjá á Netinu. Með plöntuvefsjánni er Náttúrufræðistofnun að taka í sína þjónustu nýjustu tækni í miðlun upplýsinga um Netið þannig að notandinn getur nálgast traustar og áreiðanlegar upplýsingar um náttúru Íslands á myndrænan hátt. Plöntuvefsjáin er fyrsti áfangi í rafrænni miðlun náttúrufarsgagna stofnunarinnar og í henni má finna ítarlegar upplýsingar um háplöntur, mosa, fléttur og sveppi, útbreiðslu þeirra og einnig staðreyndasíður sem gefa ítarlegar upplýsingar um sérhverja plöntutegund með plöntulýsingu, ljósmyndum, röðun tegundar innan flokkunarfræðinnar, upplýsingum um búsvæði og útbreiðslu og fróðleik um skaðsemi og nytjar plöntunnar. (Apríl 2006).